Bakı 2015 Avropa oyunlarında velosiped üzrə üç müxtəlif kateqoriyalarda və fərqli vaxtlarda yarışlar keçirilib: dağ velosipedi, şosse velosipedi və BMX velosipedi.

Ümumilikdə velosiped yarışlarına 13 İyundan start verilib. Elə ilk gün dağ velosiped idmanı üzrə yarış şəhərin şimal-qərb hissəsində yerləşən Dağ Velosipedi Parkında baş tutub.

Bakı 2015-də keçirilmiş dağ velosipedi idmanı üzrə yarışlarla bağlı bəzi məlumatlarla tanış olun:

İştirakçıların sayı - Dağ Velosipedi idmanı üzrə yarışlara 73 idmançı (45 kişi, 28 qadın) çıxıb.

İştirakçı ölkələr – Velosiped yarışlarında 33 MOK nümayəndəsi iştirak edib.  Azərbaycandan təkərlər üzərindəki mübarizəyə 3 idmançı qatılıb.

Medallar – Dağ velosipedi üzrə 6 dəst medal təqdim olunub.

TİTULLU İDMANÇILAR

Dağ velosipedi yarışlarında 4 Olimpiya medalçısı yarışıb.

İtalyan Marko Aurelio Fontana - Pekin 2008 iştirakçısı,  London 2012 Olimpiya Oyunlarında kişilər arasında dağ velosipedi yarışında bürünc medal qazanıb.

İsveçrədən Nino Şurter - Pekin 2008-də bürünc, London 2012 Olimpiya Oyunlarında gümüş medalçı, üçqat dünya çempionudur. 2009, 2012 və 2013-cü illərdə titul qazandıqdan sonra  21 yaşında Beynəlxalq Velosipedçilər İttifaqının (UCİ) Dünya Kubokunun sahibi olub.

MARAQLI MƏQAMLAR

İtalyan Marko Aurelio Fontana bundan öncəki Olimpiya oyunlarında Nino Şurterlə rəqib olub. Pekin 2008-də və London 2012-də o, hər dəfə Şurterdən sonra finişə çatıb. Fontana Pekində finişə beçinci, Şurter isə üçüncü çatıb. Londonda isə Şurter ikinci, Fontana isə üçüncü olub.

Fontana Bakıda köhnə rəqibindən revanş alacağını düşünürdü. Lakin o, Avropa Oyunlarında nəinki  Şurterdən önə keçə bilmədi, ümumiyyətlə yenə də medal üçlüyünə daxil olmağı bacarmadı.

Şurter isə yarışda təkərləri boşalsa belə, dağ velosipedi yarışlarında çempion titulunu qazandı.

REKORD

Kişilər arasında dağ velosipedi üzrə yarışların nəticəsi birmənalı olaraq isveçrəlilərin xeyrinə başa çatdı.  Belə ki, 3 medalın üçü də İsveçrə komandasının üzvlərinə qismət olub.

Qadınların yarışında da isveçrəli velosipedçilər uğur qazanıblar. Medalların hamısı olmasa da, üçündən ikisi İsveçrəli qızların boynuna taxılıb.

QALİBLƏRİN SİYAHISI

Kişilər arasında:

Nino Şurter (İsveçrə) – qızıl
Lukas Flakiger (İsveçrə) – gümüş
Fabian Giger (İsveçrə) – bürünc

Qadınlar arasında:

İolanda Neff (İsveçrə) – qızıl
Katrin Stirnemann (İsveçrə) – gümüş
Maya Vloçkovska (Polşa) – bürünc